ໃນຕອນເຊົ້າຂອງວັນທີ 23 ກໍລະກົດ 2020 ໜ່ວຍຊາວໜຸ່ມ ຫ້ອງການ ກະຊວງ ຊັບພະຍາກອນ ທຳມະຊາດ ແລະ ສິ່ງແວດລ້ອມ ໄດ້ຈັດກອງປະຊຸມວິທະຍາສາດປະຈຳເດືອນຂຶ້ນ ໃຫ້ກຽດເຂົ້າຮ່ວມ ເປັນປະທານ ໂດຍ ສະຫາຍ ນ. ບົວຄຳ ສຸລິວັນ ເລຂາໜ່ວຍພັກ, ຫົວໜ້າຫ້ອງການ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ ມີເລຂາໜ່ວຍຊາວໜຸ່ມ ພ້ອມດ້ວຍສະມາຊິກຊາວໜຸ່ມ ເຂົ້າຮ່ວມ ທັງໝົດ 22 ສະຫາຍ ຍິງ 14 ສະຫາຍ.

 

 

ຈຸດປະສົງຂອງກອງປະຊຸມໃນຄັ້ງນີ້ ເພື່ອສ້າງຄວາມເຂັ້ມແຂງໃຫ້ ສະມາຊິກຊາວໜຸ່ມພາຍໃນໜ່ວຍ ໄດ້ ສະແດງຄວາມກ້າຫານ, ກ້າສະແດງອອກ ແລະ ເປັນເວທີໃນການແລກປ່ຽນຄວາມຮູ້ຊຶ່ງກັນ ແລະ ກັນ. ສໍາລັບຫົວຂໍ້ທີ່ນໍາມາບັນຍາຍໃນຄັ້ງນີ້ມີ 2 ຫົວຂໍ້ຄື:

  1. ຄວາມຮູ້ພື້ນຖານກ່ຽວກັບພະຍາດໄຂ້ເລືອດອອກ ນຳສະເໜີໂດຍ: ສະຫາຍ ນ. ພຸດທະລັກ ສີດາຈັນ
  2. ວິທີລົງຂ່າວຢູ່ໃນເວບໄຊ ກຊສ ນຳສະເໜີໂດຍ: ສະຫາຍ ນ. ດາລາວັນ ຫຼວງໂຄດ



 

ກອງປະຊຸມໄດ້ມີການແລກປ່ຽນບົດຮຽນຢ່າງກົງໄປກົງມາ, ມີການຖາມ-ຕອບ ດ້ວຍບັນຍາກາດທີ່ເປັນ ກັນເອງ. ເຊິ່ງໄດ້ດຳເນີນເປັນເວລາເຄິ່ງວັນ ແລະ ສິ້ນສຸດລົງດ້ວຍໝາກຜົນທີ່ຈົບງາມ.