ເພືອເປັນການຜັນຂະຫຍາຍ ວຽກງານຊາວໜຸ່ມຫ້ອງການ ກຊສ, ພ້ອມທັງເປັນການຖອດຖອນ ບົດຮຽນເຊິ່ງກັນ ແລະ ກັນລະຫວ່າງຊາວໜູ່ມພາຍໃນຫ້ອງການ, ຈັດຂື້ນໃນ ວັນທີ 11 ມີຖຸນາ 2020, ທີ່ຫ້ອງປະຊຸມ ຫ້ອງການ, ໂດຍການເປັນປະທານ ຂອງ ສະຫາຍ ລຽນໄຊ ບຸນມະນີວັນ ຮອງເລຂາ, ປະທານກວດກາຫນ່ວຍພັກ, ຮອງຫົວໜ້າຫ້ອງການ, ມີສະຫາຍ ນາງ ວິໄລພອນ ຄົງລອດ ຫົວໜ້າໜ່ວຍຊາວໜຸ່ມຫ້ອງການ, ພ້ອມທັງສະມາຊິກຊາວໜຸ່ມພາຍໃນຫ້ອງການເຂົ້າຮ່ວມ.

ໃນກອງປະຊຸມດັ່ງກ່າວກໍ່ໄດ້ຮັບຟັງການບັນຍາຍໃນຫົວຂໍ້ ຄວາມສຳຄັນຂອງນ້ຳ ແລະ ຊັບພະຍາກອນນ້ຳ, ຊື່ງສະເຫນີ ໂດຍ ສະຫາຍ ວຽງໄຊ ສຸກດາລາ, ປະເທດສິງໂປຕົ້ນແບບສີຂຽວ, ເຕັກນິກ ຊື່ງສະເຫນີ ໂດຍ ສະຫາຍ ນາງອະນຸສອນ ຫຼວງອາໄພ ແລະ ວິທີໝັກຫຍ້າສຳລັບໄປລ້ຽງສັດ ໄລຍະຂາດແຄນຫຍ້າສົດ ຊື່ງສະເຫນີ ໂດຍ ສະຫາຍ ກຸແກ້ວ ສີຫາລາດ ແລະ ການບັນຍາຍໃນຫົວຂໍ້ ວິທິປູກໜໍ່ແຍ້ ຊື່ງສະເຫນີໂດຍ ສະຫາຍ ນາງ ສົມຈັນ ຈັນທະລັງສີ.

ພາຍຫຼັງທີ່ໄດ້ຮັບການບັນຍາຍໃນແຕ່ລະຫົວຂໍ້ແລ້ວ ສະຫາຍ ອິນແປງ ວົງພັກດີ ຮອງເລຂາໜ່ວຍຊາວໜຸ່ມຫ້ອງການ ກໍ່ໄດ້ຜ່ານຂໍ້ຕົກລົງ ວ່າດ້ວຍການອະນຸມັດໃຫ້ສະມາຊິກຊາວໜຸ່ມ ລາອອກຈາກການເປັນສະມາຊິກຊາວຫນຸ່ມປະຊາຊົນປະຕິວັດລາວ ສະບັບເລກທີ 049/ກຊສ, ຄຊປປລ, ລົງວັນທີ 28 ພຶກດສະພາ 2020, ຊື່ງປະກອບ ມີ 3 ສະຫາຍ ຄື: ສະຫາຍ ສົມອຸລາ ຍະພິຈິດ, ສະຫາຍ ວຽງໄຊ ສຸກດາລາ, ສະຫາຍ ນາງ ຄອນແສງ ທຳມະໄຊ. ໃຫ້ກຽດມອບຂໍ້ຕົກລົງ ໂດຍ ສະຫາຍ ລຽນໄຊ ບຸນມະນີວັນ ຮອງເລຂາ, ປະທານ ກວດກາຫນ່ວຍພັກ, ຮອງຫົວໜ້າຫ້ອງການ.

ຈາກນັ້ນທ່ານປະທານກໍ່ໄດ້ສະແດງຄວາມຊົມເຊີຍຕໍ່ກັບ ສາມສະຫາຍ ທີ່ໄດ້ປະກອບສ່ວນກ່ຽວກັບວຽກງານຊາວໜຸ່ມທີ່ຜ່ານມາ, ພ້ອມນັ້ນກໍຍັງໄດ້ໃຫ້ຄຳໂອ້ລົມຕໍ່ກັບສະມາຊິກຊາວໜຸ່ມ ໃຫ້ມີຄວາມບຸກບືນກ່ຽວກັບວຽກງານ ສີ່ບຸກ ເປັນຕົ້ນ ທາງດ້ານແນວຄິດ, ການຝຶກຝົນຫຼໍ່ຫຼອມຕອນເອງທາງດ້ານການເມືອງແນວຄິດ, ດ້ານວຽກງານການຈັດຕັ້ງ ແລະ ທາງດ້ານວິຊາຊິບສ້າງເຮັດງານທຳ ນຳອິກ.